曾蔭權同許仕仁（圖）兩個有好多共通點，包括同為資深政務官、先後去過哈佛進修、一齊合作喺金融風暴中打過國際大鱷等，但立法會金融服務界代表詹培忠噚日就講多樣，佢話曾、許兩人係世交，除咗曾、許兩人係同事之外，兩個人嘅伯爺都一齊共事過。咁就要講番抗日時期，詹培忠話曾蔭權同許仕仁嘅父親，都曾經喺東江縱隊旗下一個情報機關做同事。
詹培忠對於許仕仁回朝，有些不是味兒，話自己好拒抗特區回復「冇英國旗嘅港英時期」，礙於中央喺商人治港同公務員治港中選咗後者，都冇得傾啦。
立法會噚日辯論數碼港，好多議員踴躍發言，搞到立法會噚日完唔到，要拖到今早繼續辯論，返咗香港嘅人大政協又要遲啲先可以上返去。不過自由黨今次就比民建聯聽話，好似批評民主派玩突襲嘅人大代表馬力、佢嘅政協黨友曾鈺成同陳鑑林都唔見人，睇嚟佢哋冇返香港開會，反而田少同周太就有落返嚟香港頂住班民主派，田少為己為人，佢隻馬「自由武士」噚晚跑出，佢趕及拉頭馬。
傳真︰2623-9278
電郵︰