近排二手樓市究竟有幾旺？香港置業黃冠麟話，旺到連六根清淨嘅出家人，都感受到熾熱嘅買賣氣氛，出動買樓。
一名年近半百嘅尼姑，幾日前打電話去港置問盤，經介紹參觀長沙灣宇晴軒二手放盤，當日，尼姑帶同父母同哥哥一齊睇樓，睇完即買，斥資二百五十八萬，買入三座高層B，六百三十一呎，呎價近四千一。
為乜買樓？自住同投資都唔切合佢嘅身份，代理話，最大可能係買畀屋企人，因為買家登記地址係區內舊樓。據聞，佢同阿媽聯名買樓。
佢雖然唔係咁熟樓市，都知道近期樓價愈升愈高，驚遲啲買，連首期都唔夠畀，於是爽快入市，傾盡二十年積蓄約八十萬做首期，之後由屋企人負責供樓。
尼姑資助屋企人買樓，本來無乜特別，不過親自去睇樓簽約，就比較少見。
樓市係賣方天下，要買二手樓，追價幾乎變成指定動作，問題係次數多少。
九龍灣淘大花園R座低層三室，喺農曆新年之前已經有買家出價一百五十萬洽購，業主喺親友勸喻下，反價到一百五十五萬，到農曆新年後再反至一百五十八萬，同一百六十二萬。點知，重有買家肯買，業主見機不可失，於是再反價到一百六十五萬，並成功沽出。
一個多月反價四次都賣到樓，比起最初放盤，袋多十五萬，可見樓市係幾咁熾熱。
不過，業主喺九二年用一百八十二萬四千買入單位，就算以高市價八個巴仙賣出單位，結果都要蝕讓。
地產代理生意愈嚟愈好，要不停開舖請人擴充。噚日勞工處同僱員再培訓局，搞咗個大型招聘會，兩大代理行中記、美記都有參加，兩行嘅高層，重做招聘講座嘅客席講者，可見代理界真係求才若渴。
中原執行董事陳永傑話，今年會繼續擴軍，增設五十間分行，計劃請多五百五十人，包括五百個營業員，五十個後勤。佢重喺招聘會介紹吓𠵱家嘅地產市道，同地產業前景。最近樓市交投咁暢旺，喺呢個時候搞招聘會，相信可以事半功倍。
另外，美聯執行董事陳坤興話，會喺招聘會提供三十個後勤職位，至於前線空缺，更加不設上限，即場派發五百份申請表，重同部份應徵者面試。
美記今日派成績表，公布○四年業績，市場一般都會問埋對手中記條數。
中記今年搶閘公布咗先，營業額二十九億六，比○三年勁增七成四，住宅部佔十四億，增加六成八。
中記今年首個業績理想，後勤居功唔少，所以今個月會向後勤員工派發第一季花紅，唔會少過四分之一個月薪金。
倘若今個月營業額多過一億九千萬，重會派發八百蚊利是。公司賺到錢，前線大豐收，後勤都受惠。
南豐發展喺日前嘅記招上，向記者透露，正在研究將荃灣長豐工業大廈轉做酒店，唔知係咪消息出街後，引起租客不安，南豐噚日竟然要刊登聲明澄清。
聲明指出，南豐發展只係構思修改南豐紗廠，即係四、五同六廠嘅用途，目的係提升地皮價值，現階段仍然只屬初步研究，並無任何實質計劃或安排。
南豐並重申，紗廠仍然如常運作，目前冇計劃搬遷，就算係，集團都會有足夠地方，畀紗廠繼續營運。
電郵地址：
