阿董今日，又會匆匆撲上北京，接受「政協副主席」欽點，同時，就將會宣布「辭職」！至於繼任人曾蔭權，係做得嗰兩年定玩五年，盛傳將會由中方再次「釋法」，平息抗議！
做兩年定五年，完全視乎係邊個做！基本法寫到明：特首一任五年，經由林瑞麟強調、基本法草委金庸確認、基本法委員會陳弘毅重申，土共上京狂篤背脊，話下屆特首只應兩年，法律政治化，咁胡溫日日高嗌：「依法治國」，原來又係流嘢囉！
兩年定五年，完全對人不對事，「港英餘孽」攝位，就兩年，若然換咗係梁富華、蔡素玉、馬力或者鄔維庸做（若然佢哋有咁把炮嘅話），就一定係五年，呢一樣就係中國嘅「法治精神」嘞！
對人不對事、雙重標準，喺中國人社會，真係通街都見！八方手上揸實好多藍籌，其中一隻就係中電嘞！中電最近由老細嘉道理發表對股東報告書，裏面有一句：「日後規管架構如有任何更改，無法讓股東在投資電力基建方面獲得適當回報，中電均會強烈反對。」
咁即是話，中電嘅發展策略，係一定要顧及股東利益，股東利潤，係必須獲得照顧嘅！嘩，咁即是包括加電費！好呀！但凡住喺港島，而又揸住中電股嘅，都會舉腳贊成！
呢句說話，出自嘉道理之口，嘿，唔知係咪啲議員及「學者」，始終怕鬼，哼都唔敢哼半句喎！若然換咗係第二個本地老闆，話要照顧股東利益，包保萬炮齊轟呀！
香港係一個國際城市，國際資金就梗係馨香啲，所以嘉道理可以話：「紅灣半島拆卸風波、西九龍項目、維港填海及領匯上市事件，這些問題對廣大市民，均不及確保供電充足可靠的規管機制討論來得重要」，係幾咁豪氣！跟住嘉爵士話：「有關決策的過程，均不能達到政府及社會人士的期望」，連嘉道理都洞燭先機，一早就曲筆批董，咁你話阿董係咪應該落台？
不過，亦冇人敢大罵嘉道理身為外國人，干預香港內政喎！所以香港始終係鬼佬高級啲！恢復香港國際都會地位，或者就只可以靠嘉道理呢啲商家，講到明：係呀，我係要為股東保障利潤呀，咁就冇人敢屹咯喎！由港英餘孽做特首，正如老左話頭：恢復英式管治，好吖！當奴，睇你嘞！
傳真︰2623-9278
電郵︰