董建華辭任特首的消息流傳多日，有指今日他會宣布辭職，掀起全城熱話。昨日演出時裝騷的名模LisaS.同情董特首壓力大，更稱讚他：「佢做得幾好。」而出席珠寶活動的名模李嘉慧與名媛楊諾思，則大讚曾蔭權親民。
香港最高首長替換問題醞釀多時，董建華今日料有正式公布，事件哄動全城，社交圈亦議論紛紛。昨日在Chopard及Fendi活動上，名模、名媛亦各抒己見。
混血女模LisaS.為Fendi示範新裝，她對董特首離任大感詫異說：「𠵱家香港整體都幾好，唔應該揀喺呢個時候離開！佢其實都做得幾好，特首係全港最大壓力嘅職位，有人話佢係健康出問題，我諗可能多年積落壓力。」
而出席Chopard珠寶記者會的楊諾思相信董特首離任對香港影響不大，又謂他七年來無功勞亦有苦勞，她說：「佢係好好嘅老人家、好勤力嘅特首，做得好唔好又另計啦，始終做足七年！曾生（曾蔭權）都幾好，形象好又親民，維持香港經濟繁榮應該冇問題。」
名模陳嘉容和李嘉慧有份演出珠寶騷，陳嘉容因房屋政策問題，淪為負資產，她說：「我帳面蝕咗幾十萬，無論點講，董特首做咁耐都係好辛苦。我對董太嘅特別言論最深刻。」李嘉慧則十分支持曾蔭權，她說：「呢幾年香港不過不失啦，轉吓人都係好事，曾司長係虔誠天主教徒，好似每日返工前都去祈禱先，我諗佢對信仰咁誠心堅持，亦會誠心誠意管治香港，我都幾有信心。」
此外，曾上街支持「○七普選」的鄧永鏘昨晚出席上海灘新裝騷時妙論曾蔭權說：「曾生好！一國兩制呀，因佢唔係有錢人，但又打煲呔、做爵士，又識同啲商人打交道，同啲香港人溝通到，係真正嘅香港人管番香港。」
賭王何鴻燊暗示換特首是無視普選的絕招，鄧永鏘說：「其實中國特登漏呢個消息出嚟，等特首冇得郁！」問他如何評價特首？他說：「佢都做咗七年啦，乜都做夠，日日都俾人鬧。」
採訪：RitaLeung
攝影：ChanChiLam、ChenWaiOn
