滙豐大班艾爾敦噚日出席咗兩個公開場合，包括黃昏喺禮賓府嘅「新鈔票公益珍藏套」遞交儀式。雖然中銀香港總裁和廣北同渣打香港行政總裁蘇利民，以及滙豐執行董事柯清輝都在場，不過最「紅」者非艾爾敦莫屬。八方噚日聽艾爾敦講，佢禮拜日喺倫敦返港，諗住喺屋企花園休息十分鐘，不過風和日麗，坐坐吓佢就瞌着咗，十分鐘變咗兩個鐘，所以近幾日都帶住兩個太陽喺塊面上。
而特首夫人董趙洪娉噚日亦以公益金會長身份，出席呢個慈善活動，董太自然成為傳媒焦點，好多記者追問佢老董辭職單嘢。不過董太依然好口密，就連笑起上嚟都唔夠膽擘大個口，唔知係唔係驚漏口風。董太對於記者所有問題，好似會唔會同老公上京、會唔會唔捨得禮賓府等，佢全部都唔肯答就即刻鬆人。
傳真︰2623-9278
電郵︰
