縱橫影壇幾十年嘅奇連伊士活（ClintEastwood），只係用咗短短嘅三十七日嚟拍攝《擊情》，就勇奪今屆奧斯卡「最佳影片」、「最佳女主角」、「最佳男配角」同「最佳導演」四個大獎，真係唔到你唔服，而套戲今日會喺香港上映。
雖然奇連今年已經七十四歲，但依然有心有力，佢喺《擊情》度做導演之餘，重扮演一個心事重重嘅拳擊教練，演得好有味道，難怪有指原來佢係想憑呢部戲問鼎奧斯卡影帝喇！而扮演女拳手瑪姬嘅希拉莉史雲克（HilarySwank），能夠第二度封奧斯卡影后，除咗演技精湛之外，有奇連同摩根費曼（MorganFreeman）兩個老戲骨做對手戲，亦幫咗佢唔少。奇連重出動埋八歲女兒摩根伊士活（MorganEastwood），客串扮演坐喺貨車入面嘅細路女㖭！
另外，近日有傳聞話珊迪娜布洛（SandraBullock）先至係《擊情》女主角嘅首選，又話佢最後推咗唔拍，珊迪娜睇到呢個報道後即刻反擊，佢話：「我其實一直想拍呢部片，但係啲人總係覺得女人拳擊片唔收得，後來我拍咗另一部戲，跟住佢哋就搵咗希拉莉同奇連嚟拍。」𠵱家希拉莉憑呢個女拳手角色封為奧斯卡影后，珊迪娜就話冇唔開心，因為世事成日都係咁。