恒隆地產執行董事吳士元（Terry）一向都紅光滿面、精力過人，不過「鐵人」都有病嘅時候。話說今年一月二號，Terry見頭痛去搵家庭醫生，點知食咗藥個頭重係痛到瞓唔着。醫生都覺得唔妥，寫紙叫佢照吓個腦，一照之下，連見慣大場面嘅Terry都嚇一跳，「就喺個腦中間，腦下垂體度有個乒乓波咁大嘅瘤。」
好彩個瘤係良性，太太立即幫佢安排去美國就醫，佢同老細陳啟宗交代完，一月十號就由太太陪同飛走。由於病情已經非常嚴重，Terry十一號見史丹福醫院嘅醫生，十四號就動手術。手術前一晚，Terry輾轉反側，細心嘅吳太班咗部手提電腦兼《下一站…天后》嘅DVD去醫院，等佢有啲細藝，點知Terry同老婆講，「我下一站係手術室噃！」
幸好Terry吉人天相，体息咗五個星期就康復，情人節當日返工，班同事重同佢開咗個歡迎派對。佢話大病過後，領略到要保重身體，同愛惜身邊愛你嘅人。
傳真︰2623-9278
電郵︰