最近有報道話商天娥不滿黎姿拍無綫新劇《胭脂水粉》時扮大牌，加上又成日唔記得對白，激到娥姐即場爆粗鬧黎姿。噚日兩位主角一齊開工，有講有笑澄清不和傳聞，就連趕住去宣傳劇集《心花放》嘅監製梅小菁，亦特登走嚟撐黎姿，重讚佢又乖又勤力，就算病都照開工。
黎姿對於呢啲傳聞一於少理，佢話：「我唔會去回答一啲唔屬實嘅報道，我一直只係做好自己嘅本份，而且從來冇人用粗口鬧過我。雖然我同娥姐第一次合作，但我一直好欣賞佢嘅演技，我好鍾意佢以前套《儂本多情》，一放學就即刻趕返屋企睇，佢係前輩，好多嘢要向佢學習。」
娥姐聽完黎姿證明佢冇爆粗，重好欣賞自己，娥姐之後話：「做咗咁多年戲，重點會用爆粗去表達呀，況且我本身都唔鍾意講粗口，但我哋喺戲入面成日鬥嘴，一見面就要鬥。」
蔡依林噚日喺台灣同好友羅志祥一齊錄影節目，對於有雜誌最近拍到羅志祥夜訪蔡依林香閨嘅相，雖然兩位主角否認緋聞，但睇佢哋兩個喺節目中嘅對答，同埋羅志祥毫不避嫌一手抱起蔡依林嘅動作，足見佢哋交情不淺，唔知佢哋有冇機會發展呢？
港台協辦嘅「IFPI香港唱片銷量大獎頒獎禮」下月二十二號舉行，周國豐噚日喺電台節目度話李玟已落實擔任表演嘉賓。當晚更有向黃霑致敬嘅環節，由陳奕迅唱出霑叔創作嘅金曲，重話聯絡緊溫拿樂隊，希望到時佢哋首次公開演唱由顧嘉煇作曲、鄭國江、潘源良同林夕填詞嘅《霑叔》。
鄭少秋同鄧萃雯主演嘅無綫新劇《御用閒人》下星期一播映，秋官自從九三年演出《大時代》後，每逢有新劇推出，股巿都跌。網上博彩公司易勝博就以下星期二（十五日）恒生指數收巿結果係點，畀網民賭一鋪，不過大家都係睇吓算喇。
白韻琴同男友謝偉俊（Paul）前晚去奧海城睇電影《情迷祖莉亞》首映。前日係婦女節，白姐姐話：「未來中國婦女更加有權力，開始抬頭，我覺得女仔𠵱家嘅適婚年齡應推到三十七歲，因為阿Paul接嘅離婚個案，女方都係細過三十七歲嘅。」
