恒指升59點，期指只升3點，低水122點。低水通常代表個市應該淡淡哋，但好多時實際係相反，低水之後個市升畀你睇嘅例子成日出現。而且，滙控（005）與恒生（011）下周除息，總共會拖低恒指87點，所以期指實際只係低水35點，唔值得大驚小怪。
和黃C輪：是日升幅最大嘅恒指成份股係思捷（330），升幅2.26%，其次係和黃（013），升幅2.24%。論帶動恒指最多嘅則係和黃，帶動21點。高盛出報告，認為和黃3G業務會帶來驚喜，評級係「跑贏大市」，12個月目標價85元。和黃現時68.50元，信「高佬盛」嘅話，和黃水位有24%。
和黃C輪最熱門嘅係3836，1日成交金額近1億元，7月尾夠鐘，輪價23.2仙，溢價5.6%，槓桿率29.5倍（有效12.3倍），引伸波幅19.9%。第2熱門嘅係3561，壽命比3836短個零月，輪價26仙，溢價3.1%，槓桿率26.3倍（有效13倍），引伸波幅20.4%。3561輸蝕壽命，槓桿率輸蝕好少，但溢價慳番2.5個百分點，短炒和黃C輪，先揀3561。
滙控C輪：滙控3點59分過後，有人嘜咗18手每手4000股128.50元，滙控咁就收128.50元，跌0.50元。恒生則收107元，升0.50元。恒生下周一除息1.9元，滙控則下周三除息2.1元，恒生早兩日除息，好息者早啲入市。遲多陣，有機會輪到滙控搶息。
昨日推介嘅滙控C輪4445，見過30仙後回到28仙收市，升得1仙，要趁機上車，博殺嘅揀4445。計數買輪，則揀4441，收42.5仙，升2仙，成233球，買賣唔憂冇對手。
章盛