老董今次下台一奇景，就係官方冇講過一句話，包括本港三大左報都冇聲氣，反而其他傳媒就大寫特寫，連老董即將今日宣布劈炮都寫埋，真係笑話，非常配合老董慢三拍嘅性格。
既然消息滿天飛，港台都唔敢怠慢，噚日就叫定前有線電視新聞之花張寶華今日下晝stand-by，準備做《議事論事》嘅節目。
寶娃娃離開有線之後，為《快周刊》寫一個叫做「香江對」嘅專欄，佢話係喺台灣訪問柏楊嘅時候，學識咗古代重要對話都簡稱做「對」。
講番《議事論事》個節目，主持人李鵬飛係全國人大代表，所以身在北京返唔到嚟，要搵寶華暫代。八方問飛哥身體點，佢話，過年前發現患咗胃癌第一期，好彩個醫生手術高明，𠵱家已經完全冇事，藥都唔使食，當然醫生要佢多休息，同埋千祈唔好吸二手煙。
北京咁多事發生，飛哥決定留低至兩會完結先走，飛嫂就相陪左右，大家可以放心。
（圖）張寶華離開有線後，少咗喺幕前出現，佢嘅fans一定好掛住佢。
傳真︰2623-9278
電郵︰