古巨基前晚在紅館演出處男個唱，最特別是他將機動戰士高達搬上台。基仔坐在機械手上升至半空，其間差點跌倒，幸好有驚無險。而一向愛哭的基仔今次更淚如雨下。
古巨基前晚演出個唱《古巨基勁歌．金曲演唱會》首場，又唱又跳，更表演轉動指揮棒，可惜最後因手汗多，不慎失手跌棒落地，基仔只好開玩笑說：「啱啱支棍跌係我刻意安排，我覺得咁靚啲。」
對於首次表演跳舞，基仔開玩笑說：「同城城有冇得鍊呀？唔係話胸肌呀，係舞技呀。排舞老師Sunny話我跳得似佢啱啱識嘅城城咁，原來佢哋係小學一年班同學，嗰陣得六歲。《殘酷一叮》個台主莫先生都六歲，Paco有次搭住佢膊頭話去飲嘢，第二朝Paco（黃柏高）就問我想唔想有個細佬，我隨時俾個小歌神威脅。」
個唱最特別是基仔將機動戰士高達搬上台，整個機械人頭及半身聳立在台邊，中間有隻機械人手，基仔坐在機械人手掌上升至半空唱歌，但因他沒有做任何安全措施，欲企立時幾乎跌倒，事後他說：「我本想企起身，但好跣，於是咪唔企囉，已經加咗扶手㗎。」
而經常感動落淚的基仔前晚亦不例外，提到事業低潮時說：「九七年我唱到首《歡樂今宵》，有人問我想唔想開演唱會，當時我好恨但唔敢，唔知得一首hit歌可唔可以做到一個好個唱，想等下次機會，估唔到歡樂金宵再會後，要等多八年。」然後全場大合唱《愛與誠》。
個唱結束時基仔安歌再度出場，他終忍不住邊哭邊說：「我聽過啲人話鍾意古巨基好老土，點解我要令到撐我嘅人咁辛苦？我哋好似一家人，當時出咗去冇講低幾時返，我知你哋會等我返嚟唱歌，我先咁堅持決心返嚟唱，我唔會令大家白白咁等。」
事後基仔說：「我畀自己八十分，跳舞冇控制情緒咁難，Paco同我父母都叫我唔好喊，鬼叫自己感性，我前一晚綵排時已經喊到連歌都唱唔到。」黃柏高則表示給基仔九十五分。
採訪：李珮洳 攝影：何國豪
