在港有三十三年歷史的現代貨箱，噚日響葵涌貨箱碼頭舉行一個簡單儀式，慶祝處理咗第五千萬個標準箱。現代貨箱嘅大股東係九倉，九倉主席兼下屆特首黑馬吳光正，噚日無現身。取而代之嘅係好耐無見嘅高級副主席李唯仁。
李唯仁保持一貫耍太極嘅作風，加上𠵱家係敏感時間，八方問乜，佢都只係耍手擰頭。至於吳光正點解唔到，佢就話吳生未返香港，八方估佢重響北京開緊人大政協會議啩。
雖然見唔到吳光正，但八方就見到一名黑超型男，佢就係經濟發展及勞工局局長葉澍堃，佢又係自動波，係咁話政府未決定幾時，同埋響邊度興建十號貨櫃碼頭。不過，八方心諗，十號碼頭一直由特首董建華倡議興建，所謂人走茶涼，葉澍堃遲吓可能做少樣嘢。
（圖）戴住黑超嘅葉澍堃（左）同現代貨箱碼頭董事總經理祈天順兩個好有台型。 梁鑑章攝
傳真︰2623-9278
電郵︰