繼九四年嘅《危險人物》後，尊特拉華達（JohnTravolta）同奧瑪花曼（UmaThurman）再度合作，一齊主演《關人矮事》續集《音樂型人》，呢部戲下個月一號會喺英國公映，前晚電影公司舉行首映禮，肥尊同奧瑪呢對拍檔當然齊齊出席啦！
原來肥尊喺首映舉行前先揸住架飛機由加州去到倫敦。對於被問到點先算型，佢話：「噚日我同老婆離開屋企，同啲小朋友講再見後就走到後院，揸飛機飛到嚟倫敦，呢樣嘢就真係型啦。」
肥尊同奧瑪喺《危險人物》入面嘅跳舞場面已經成為經典，所以今次喺《音樂型人》入面都有類似場面，奧瑪大讚呢位舊拍檔話：「佢係最好嘅跳舞拍檔，拍呢部戲最好嘅事就係可以走番埋一齊，我哋係老朋友，以前相處嘅時候好開心。」
前晚有數以千計嘅熱情影迷喺戲院外等候，而有份參演呢部戲嘅黑人女歌手ChristinaMilian，就特別着咗一件黑色性感晚裝亮相，乘機搶吓鏡。
由於肥尊喺今集由一個黑幫變成電影監製，所以出品呢部戲嘅美高梅特別出咗一本模仿電影雜誌《Variety》嘅假雜誌做宣傳，雜誌入面講番戲入面角色嘅搞笑新聞，其中最鬼馬嘅係有份參演嘅StevenTyler，會將佢個大嘴唇印喺荷李活星光大道畀遊人參觀。