嘉華國際（173）同嘉華建材（027）注入賭牌一事仍然未明朗，但其他濠江股已經趁機炒上，除咗前日提過動作多多的信德（242）及新濠（200）皆錄得不俗升幅外，其他濠江賭股如邁特科技（1031）、英皇娛樂酒店（296）等都升勢重現。
但經紀黃就覺得，現階段話濠江熱潮重臨，未免言之尚早。芬佬家陣似乎仍對工業股不離不棄，繼續收集中。
其中一隻小型工業股愛高集團（328），除一早獲得股壇長毛同埋細摩寵愛外，近排股價走勢亦甚靚仔，噚日升5.93％，收3.575元。
經紀黃話，近排有間德資行為愛高出咗份報告，話LCD顯示器出現割價，會對愛高呢類生產DVD產品商有利，皆因可以令佢哋以較合理的成本，大量生產貨品予大眾市場，並認為愛高盈利有機會出現強勁增長。因此愛高現價雖然已創下52周新高，但分分鐘高處未算高。
慕容小初