女子組合Cookies前晚在灣仔行騷，四姝以不同造型示人，更大講後台睇肉經。成員之一的Kary自爆曾在酒店偷窺Stephy沖涼，大讚Stephy除了身材正之外，皮膚亦很白皙。
女子組合Cookies近日成為便服鞋Skechers的代言人，四姝和「四葉女」陳自瑤（YoYo）前晚在灣仔出席「Skechers春夏系列花生騷及派對」。Cookies以青春、航海、吉卜賽和樂與怒四個不同造型行騷，大會又安排四姝為專程從歐洲來港的品牌高層MarvinBernstein慶祝生日，又齊齊獻吻。
Cookies因為換衫時間緊迫，所以十分緊張，Kary說：「我好緊張，真係驚到差啲甩鞋，同埋時間好趕，驚換唔切衫。」為免走光，Kary無論穿短裙或短褲都着了打底褲。問四姝在後台換衫時，可有互相偷望？Kary說：「我之前喺馬來西亞登台，同Stephy同房，我趁佢沖涼嗰陣都有『裝』佢，睇過晒佢前面同後面，佢身材好好，皮膚又白。」Theresa則說：「我雖然同Miki同房，但我冇畀佢睇㗎！」
Stephy表示入行前曾做過幫模特兒換衫的工作，她說：「佢哋喺後台真係赤條條，好開放。」Miki曾試過做騷時，跟男模特兒在後台準備，當看到對方赤裸時，嚇得不敢正視，Miki說：「我覺得入咗行之後，思想開放咗，可以成班人一齊換衫。」
問Cookies可有勇氣行內衣騷？她們異口同聲表示不敢，Theresa更被爆因為怕凍，曾在短裙貼暖包，在表演跳舞時，跌了暖包出來，十分尷尬。
採訪、攝影：馮美茵
