廢董「辭職」，宮廷黑箱，又出現騎呢異變！至今日為止，廢董尚未官式、正式、歷史性地向壽爺中央主人，提出白紙黑字書面「請辭」，佢個大名，在「政協副主席」候補名單，終於出現！
而港澳辦副首領左耳陳，竟然話佢至今尚未收到廢董辭職消息，又補充：若然有人當「選」政協副主席之後，又食言唔辭去特首職，係吹唔脹嘅！
原來廢董一啲都唔廢，精到甩辮！佢知道共產黨冇信用，若然遞咗信，跟住嗰頭共產黨收番個政協副主席唔畀佢，唔通上訴去歐洲人權法庭？所以咪嘞，一手交錢，一手交貨，睇漏一眼，跟慢一步，都隨時俾人呃咗隻豬，兼收唔到錢！
所以老虎蟹都等到「政協副主席」風風光光咁擔埋口邊，開口咬到實一實，飛唔甩嘞，咁手頭先至會鬆，上遞辭職信！廢董佢伯爺浩雲老先生，係反共船務商人，知道點樣同老共打交道，收咗貨，先至過水，共產黨任何LC，都唔好信，呢條家訓，相信好早傳低，估唔到廢董今日終於大派用場！
梗係喇！廢董在江太祖睇場時代，喺上海圈咗咁多幅靚地，幅幅值租，今時今日遭壽爺清場，冇咗「政協副主席」照住，分分鐘會俾壽爺日後收地夾雙規，慘遭殘酷共產，身家性命喎，你估講笑呀？
而另一邊，不但煲呔一早就洗晒白白，等做新郎哥，嘩，大量嘅「煲呔老友」（或前度老友，後來改投他主，收尾見到賭王帶頭押重注之後又老友番）嘅人士，經已紛紛放風，話煲呔個新檔攤，擔定櫈仔預咗佢一份喎，例如全城勁吹新鴻基前度頭馬嘅許仕仁，聽講就係政務司司長大熱㖭！
吓？乜個位唔係一早由壽爺吩咐，留定畀工聯會嘅梁富華咩？定係一早有一班土共喝住：行政會議，不准換班，必須全盤接收由廢董所留低嘅人肉地雷陣，接受監督、架空、開會偷聽，等兩年期滿，自行了斷，再拱護唐唐做真命天子？
定係「CS」個位，論功行賞，一早預留畀「餘孽大家姐」陳方安生，準備姐弟擁抱相認，慶祝前殖民地管治回朝，香港防中抗董八年聖戰勝利，終於重光？未到最後一分鐘，個黑箱裏面，係太子，定係一隻生滋貓，都冇人知！
瞓着咗咁耐，江太祖終於俾班港區人大政協叫醒番，默默發功，廢董隨時番生，發生政治屍變，咁嘅「國際都市」，唔怪得喺世界上，係一個好不文嘅笑話！
傳真︰2623-9278
電郵︰