公仔箱有位女強人一向深得老闆歡心同信任，唔少人為咗保住飯碗，都會千方百計去巴結女強人，例如啲人知道女強人係一個好虔誠嘅教徒，於是就頻頻出席教會活動，甚至索性信埋教，趁機接近女強人，同佢加深了解同溝通，講得明白啲，即係「擦鞋」。
好似娛圈有對夫婦，雖然佢哋身邊嘅圈內圈外朋友都係虔誠教徒，但每逢班朋友叫佢哋出席教會活動，佢哋都會耍手擰頭，推得就推；但自從女強人愈嚟愈得勢之後，呢對夫婦竟忽然變成虔誠教徒，又成日出席教會活動，重頻密過返父母屋企。馮仁昭聽聞對夫婦近期已經加入咗教會，究竟佢哋係真心信教，抑或另有目的？大家心知肚明啦！
張惠妹𠵱家喺波士頓進修，佢日前知道台灣財政部點名要佢補稅約三百萬港元後，第一時間打電話畀媽媽解釋，免得老人家擔心。阿妹又透過好友表示，佢𠵱家心情好平靜，重話絕冇逃稅，相信單案唔會輸，佢𠵱家以學業為重，其他嘢唔諗咁多喎。阿妹好興奮咁話，呢幾日學校放假，決定留喺波士頓。原來阿妹有啲來自台灣嘅同學係佢歌迷，紛紛同佢影相，重放上網炫耀㖭！
方力申噚日到商台接受訪問，日前佢為咗避免同緋聞女友鍾欣桐（阿嬌）同場，竟然走後門唔接受訪問。噚日小方見到記者時，死撐話唔關自己事，佢話因為見到李克勤同容祖兒喺度，以為大家唔會搵佢做訪問，佢重猛話唔介意同阿嬌合照㖭！
徐若瑄一直畀人好可愛嘅感覺，事實上佢差唔多三十歲，所以有時會俾人話扮可愛，小瑄日前接受雜誌訪問，強調自己算係「熟女」，佢話：「前陣子我看了一本書叫做《成熟的女人最美麗》，很有感覺。以前的我沒辦法看這種文字書，一看就睡着，但現在不一樣，我開始可以在這種書裏面得到很多東西。」
王家衞六月會開拍由妮歌潔曼（NicoleKidman）主演嘅西片《來自上海的女人》，王大導重答應三個月內拍完，套戲會喺哈爾濱同紐約取景，《來》片亦係王大導難得有完整劇本嘅戲。而拍檔杜可風就嫌攰，所以冇加入拍攝工作。
內地藝人陸毅日前喺長沙宣傳，佢早前曾邀請跳水公主郭晶晶拍攝MV，但佢覺得郭晶晶唔適合做藝人。陸毅話：「我覺得她更加適合當運動員，娛樂圈根本不適合她，若她在業餘時間偶爾接觸一下娛樂圈，如拍廣告和客串表演，她會很適合，但不要為了娛樂圈，放棄屬於自己的那個圈子。」
廖啟智前晚接受港台《你真超人》訪問，佢由無綫過檔亞視後，比以前開心咗，智叔話：「其實掙扎咗好耐，我喺無綫二十五年，有穩定嘅經濟，但係我唔想冇目標咁生活落去，工作環境唔係咁開心。我𠵱家搵番初入行時嘅動力，好似後生咗好多。」
