一手樓市○一年開始，扭轉開價較同區二手低水嘅局面，變為升水；舊年，重因為市場猛話供應會出現斷層，搞到一手樓價好似火箭咁飛升。美聯首席分析師劉嘉輝話，今年一二月，一手價高過二手嘅幅度，達到高峯，有四成二，係令近月買家紛紛轉投二手市場嘅原因。一二月開賣新盤唔多，主要係西環泓都與上水皇府山。
不過，大家唔使擔心一手價會進一步升水，因為今年可推售單位有兩萬幾個，比舊年一萬七千幾個多，發展商「嘜」價都唔敢太進取，以最近開售嘅將軍澳豪庭為例，只係比同區二手價高一成幾。
劉嘉輝預計，一二手樓價差幅逐步收窄至三成以下。但佢強調，唔代表一手樓價會下跌，只係發展商「嘜」價冇咁高啫。因為一手價唔會大升，咁二手都係只會平穩發展。
卓先雷偉全估計，勾地表二十七幅住宅地皮，可建一萬二千一百三十八個單位，值四百一十四億。
估計基礎係：中小型住宅每個六百五十呎、中型千呎，豪宅二千呎。除西半山波老道，其他幾幅豪宅地皮只可起幾十個單位。
好似山頂樓，估值七億六千八百萬，呎價萬八，但若以只建二十一伙計，每戶三千六百幾萬，加埋建費同利息，總成本就更高，賣價要幾高可想而知。其他幾幅豪宅地皮，情形都係咁上下。
荔枝角美孚新邨，一向交投活躍，近期銀行放寬樓按年期，同九成半按揭，買賣更上層樓，代理行都忙於插旗，繼中記周一開設「升值置業中心」後，同系利記重勇，噚日一口氣連開三行。
利記廖偉強話，今年計劃開多兩間美孚分行，員工增至百人。美孚多投資者，而且「摸貨」比例都唔細，九七高峯佔一成二，○二年低見三點一巴仙，𠵱家回升至五點七巴仙。佢估計，今個月成交二百五十宗。
美孚舊年買賣登記破千宗，為各屋苑之冠。附近多個大屋苑落成，加上毗鄰九巴車廠重建，今年有機會登場，代理果然先知先覺。
樓市火熱，業主放盤叫價三級跳，但買家追價都唔慢，世紀21陳炳強話，薄扶林花園五座中層H，業主喺農曆新年後放盤，叫價三百三十萬，後尾見市況暢旺，到月底加價至三百五十萬，近日見有同區買家出價洽購，跟手就反價，要三百六十萬，但買家都肯追價成交。
單位八百二十八呎，計落呎價四千三百五十。
有二十四年樓齡嘅薄扶林花園，一向成交唔多，但今個月至今已有四宗，同區置富花園就有十一宗。
電郵地址：
