莫寧駕臨無碇企<br>球驗客手記:大郅入雪櫃執定包袱

莫寧駕臨無碇企
球驗客手記:大郅入雪櫃執定包袱

近排熱火主場十連勝之餘,更有老將莫寧同史堤夫史密夫回巢助陣,聲勢絕對唔弱過西岸嘅一、二哥馬刺同太陽;不過就唔係個個熱火球員都分享到呢份喜悅,最少首位NBA嘅中國外援「大郅」就唔係好開心啦!

熱火需要「藍領」球員
效力熱火嘅大郅雖然有成七呎一,近年勤操體能下亦增磅成功,有成二百八十磅;表面上有身形兼可以射三分嘅佢,要作為巨無霸嘅替補可謂綽綽有餘。可惜熱火根本就唔需要一個識射三分嘅高佬,而係要個夠硬淨,幫到巨無霸防守同搶籃板的「藍領」球員;呢一瓣就正正係「大郅」嘅死穴。所以喺莫寧返嚟之後,大郅已經成為後備入面嘅第四中?前鋒,可有可無之極;噚日更加俾人擺落傷兵名單,睇嚟離執包袱嘅日子都唔遠喇!

買車仔奪標好過收息
英阿婆擲百5萬博9萬
車路士目前喺英超聯領先八分,但由於奪標賠率勁熱,好多球迷都唔會諗呢瓣。不過,喺英國有位六十幾歲嘅女士就唔係咁諗,據博彩公司威廉希爾話,該女士喺日前以十萬鎊(約一百五十萬港元)豪買奪標賠率只得一點○六二五倍嘅車仔,成為該公司歷來最豪嘅女賭客。不過,就算佢買中,都要等兩個月,重只得六千二百五十鎊(約九萬三千港元)回報,我求大俠就覺得唔化算。

伊朗中場炒車
贊迪為國捐軀攻美軍?
今屆喺德甲聯球會凱沙羅頓打得唔錯嘅中場贊迪,禮拜一喺條高速公路度炒車,撞咗落架美軍拖拉車度;但好彩只係輕傷,喺敷藥後經已出院。呢單表面係宗普通嘅交通意外,但內裏一啲都唔簡單;事關贊迪原來係伊朗國腳,伊朗同美國不嬲唔係好啱,所以有德國傳媒借題發揮,話佢係特登咁做。不過我求大俠認為,就算點唔妥,斷估唔會攞自己條命嚟教飛啩!

抽獎送低組別球會班費
幸運兒過足班主癮
某大牌子汽水廠最近搞咗個幸運大抽獎,參加者只要填上任何一間英聯賽會(不包括英超)或者蘇超聯球會嘅名字,就有機會贏取一萬鎊(約十五萬港紙)現金獎,同埋二十五萬鎊(約三百七十四萬港紙)班費。咁即係話,如果呢個幸運兒係揀咗英乙聯嘅「蚊型」球會劍橋聯而被抽中嘅話,除咗劍橋聯突然有筆咁大嘅軍費,呢位仁兄亦可以一嘗做班主嘅滋味,聽落真係幾過癮。