突然之間，好多知名人物齊齊參加大合唱，主題曲就係董生身體日漸差。鄭維健話董生平時工作時間長，壓力大，身體小毛病日積月累，加加埋埋幾沉重，可能患上「心身症」；曾憲梓話董生健康退化；李鵬飛爆料，董生隻腳有骨刺；陳永棋講，董生站立半小時就會覺得疲累。水閘既已打開，相信挺董合唱團會完全出晒嚟，高呼保董，保護董生健康，等佢可以保外就醫。
點解董生健康差得咁快呢？全國政協港澳台僑委會副主任俞曉松對記者講過，假如董生因其他理由辭職，新的特首任期係五年；假如董先生因為健康理由辭職，新的特首只係補足餘下任期，不超過兩年。
誰人替代董生都好，如果董生健康差，做唔落去，替代人只能做兩年，○七年要再選過。即係話曾司長嘅對手仍然有機會。畀曾司長做五年喎，對手再衰三竭，點爭呀。中國宮廷內，領導人健康唔係私人問題，絕對唔係私隱，而係政治權術一部份。周恩來患癌症，點樣醫，是否做手術，要由毛主席批示；巴金年過百歲，睡在醫院動彈不得已有多年，你話完全係私人理由咩？
中央突然發覺董特首健康轉差，讓他辭職休養，實在用心良苦。不過，據《明報》報道過，董先生過農曆年前到過瑪麗醫院驗身，醫生話董生狀況良好喎？唔通瑪麗醫院驗身驗得唔清楚？乜瑪麗醫院啲醫生咁走眼呀？竟然體會唔到中央苦心！據記者講，董生嘅醫生係港大名醫林兆鑫。林教授譽滿杏林，桃李滿門，唔通佢都睇唔到董先生有病，反而曾憲梓知道晒？為咗瑪麗，為咗林大教授嘅聲譽，立法會不如傳召瑪麗醫院院長與林兆鑫教授到立法會講述香港特區領導人嘅健康狀況！