做人最緊要好命水，好似煲呔咁，老董當年已經將佢投閒置散，叫佢做掃街大隊長，估唔到形勢一變，胡溫主政，棄董扶曾，煲呔喺胡溫嘅提拔下坐正，所謂黃袍加身，邊度有人可以同佢爭。
八方聽聞官場中人雖然唔多鍾意曾爵士，覺得佢成日都攞晒啲着數，但係都服佢一個中學畢業生，打低晒啲港大友，平步青雲，官至特首，連陳四萬都過之而無不及。
如果順順利利，煲呔將來退下特首位，重可以同老董一樣做國家領導人、政協副主席，你話係咪光宗耀祖呢。
至於唐唐，聽講就冇得唔服氣，加上佢家族喺大陸有咁多生意，以後就人人都要圍住曾核心做事，正如溫總講，要和衷共濟，共謀發展，將來七年或者十二年之後，或者有得玩呢。聽聞唐唐已叠埋心水做好個預算案，將來嘅事將來先算。
傳真︰2623-9278
電郵︰