美領事祁俊文噚日去咗中大演說，主題係講世貿及香港嘅長處，學生同記者問到佢點睇特首辭職傳聞，為求穩陣起見嘅祁俊文，唔肯正面評論，但就喺演說時大談經濟，着眼點當然係同美國利益有關嘅事項，包括促請港府開放航權、促進貿易發展、希望港府致力保護知識產權，重有就係希望港府恢復進口美國牛肉。
原來香港係美國第八大農產品出口地，○三年前，更一直係美國第五大牛肉出口市場，但自從○三年十二月起，港府因為瘋牛症禁美國牛肉入口之後，情況就完全唔同晒。祁俊文話，想當年香港爆發沙士，美國政府都冇禁港旅客入境美國，言下之意，係希望港府投桃報李，解除美國牛肉禁令。
如果曾蔭權真係做特首，解唔解除美牛肉禁令就唔知，不過兩個人應該好啱傾，因為祁俊文係多仔公，生咗六名子女，直情可以做呼籲港人生三個嘅曾蔭權嘅代言人。
（圖）祁俊文噚日唔肯評論特首辭職傳聞，只係大講肥牛經。
陳亮華攝
傳真︰2623-9278
電郵︰