八方出席咁多次香港不同界別嘅大小酒會同活動，淨係一次港區人大選舉投票，試過要出動到警犬，不過噚日嘅中聯辦三八婦女節酒會，就零舍特別，雖然只係有董太及中聯辦同全國婦聯官員出席，未有國家領導人，都有兩隻警犬喺門口招呼記者，但又唔係個個記者都要由警犬檢查，只係選擇性。
警員話，係主辦單位要求，佢哋先派出警犬，主要係檢查有冇人帶爆炸品或者槍械入場。兩隻警犬好可愛，警員介紹其中一隻係「小Q」，即係拉布拉多犬，但小Q顯得非常疲倦，全程只係瞓喺地下垂下頭休息，檢查任務由另一隻史賓格種警犬負責。
差人叔叔解釋話，「小Q」之前當咗通宵更，所以咁攰。
董生同董太之前咁多年出席咁多酒會，都唔用警犬防止人帶槍同爆炸品入場行刺，唔通會有人等到佢肯提早下台時先下手；抑或董生快升做國家級領導，要加強保安？八方就覺得真係多餘，不如畀「小Q」休息一日好過啦。
（圖）雖然話就話派咗兩隻警犬，不過其中一隻「小Q」（後）太攰瞓咗。
傳真︰2623-9278
電郵︰