做立法會議員嘅滋味究竟係點？問啲新仔就知，原來除咗佢哋自己要適應新生活，家人都要適應，特別係唔返屋企食飯，大家都要慢慢接受，加埋最近老董又話唔撈，就更唔得閒。
工聯會立法會議員鄺志堅話，佢老婆係公務員，有兩個仔，以前佢晚晚返屋企食飯，𠵱家就成日要開會應酬，再冇晚晚同老婆同仔食飯呢支歌唱，你話做議員係咪犧牲好大呢。
過來人王國興就搭嘴話，佢做咗咁耐公職，已經由第一階段，即係由唔返屋企食飯就打電話講聲；進化到返去食先打電話通告；以及有機會返去食都唔講，自己喺樓下快餐店食埋先上樓嘅境界，因為費事麻煩屋企人。不過，佢就堅持一定返屋企飲湯。
鄺志堅同王國興都係住家男人型，為小心起見，提防發生林煥光事件，鄺志堅唔准王國興單獨同女記者食飯，佢自己都唔會，結果八方一約就約晒佢哋兩個出嚟飯局，加埋嫻姐，安全之極。
傳真︰2623-9278
電郵︰