香港人五十萬人上街叫老董下台，佢就賴死唔走，重侮辱公眾智慧話「走好容易，留低先難」，最後佢老哥拍拍籮柚，揀咗「易」嘞，真係兒戲兼搞笑。
老董雖然收場可恥，但係一諗到佢玩燒炭玩大咗，俾老共裝局變相迫走，有少少人都開始同情佢，加上佢係上海人，最講面子，做唔埋尾走真係好慘情。
老董有好多假未放，咁樣一走，咪好蝕底？如果係一般大公司，佢可以攞番錢走。而特首辦只可證實，老董共有三百六十五日假未放，但係有冇錢賠就未有答案。
以老董年薪為二百八十萬計，扣去例假年假，佢嘅日薪有成萬銀，如果老董真係不拘小節，當係同香港人打咗三百六十五日義工，佢就好偉大，即係捐出約三百六十萬，一半可以畀老人，補償佢話增加生果金嘅宣言，另一半畀沙士受難者家屬贖罪，你話唐唐係咪要鳴謝佢呢。當然如果老董突然宣布佢只係退休前休假，唔係辭職，人人就肯定跌晒落地，寫個服字。
傳真︰2623-9278
電郵︰