德國球壇最近受「球證黑哨」事件籠罩，不過德國嘅球旁證嘅表現就似乎冇乜改善，好似星期日場柏林哈化主場對凱沙羅頓嘅德甲聯直播賽事，哈化其實打得唔差，但意外落後之後就竟然有兩個入球都被判越位在先作廢。不過，慢鏡頭重播就顯示佢哋根本冇越位，可惜無論係執法嘅球證同埋旁證，都冇明察秋毫；唔怪得知柏化球員尼安度夫激動到要即場撕爛自己件波衫，更被罰牌啦！
雖然哈化最後憑後備入替嘅麥龍追平，同凱沙羅頓打和一比一，不過喺主場痛失兩分，就對佢哋爭下屆歐冠盃參賽席位（即聯賽前三名）有好大影響；因為佢哋𠵱家以四十分排第五，落後第三位嘅雲達不來梅三分。難怪哈化嘅教練高斯喺賽後都語帶雙關咁話：「對於球隊可以喺今場波終於取得入球，我好高興，因為有咁嘅球證同旁證執法，我哋要入到波實在唔容易㗎！」
熱火老鬼鬥騷「哥利」
噚日熱火作客大勝騎士，奧尼爾呢位九二年選秀狀元，因犯規問題只係打咗二十幾分鐘，但兩位隊友九二年嘅榜眼莫寧同探花列拿，就趁呢個機會表現自己：列拿嘅七分同四個籃板算OK；前者打兩分鐘就貢獻一分、一個籃板同封阻，反而同樣打兩分鐘嘅大郅就捧蛋，要加油啦！
英校長會籲樹好榜樣
英國學生哥鍾意睇波就唔使講喇！但佢哋啲先生就好頭痛，原來啲學生睇到球星響場度猛講粗口，返到學校就有樣學樣。最近，有個中學校長會嘅組織就呼籲，各球星唔好樹立壞榜樣，重點名曼聯嘅朗尼同堅尼㖭。其實，球星都要盡社會責任㗎嘛，唔係識踢波就可以為所欲為㗎！
阿祖出絕招掃烏氣？
國米前鋒阿祖安奴周日終於打破近三個月嚟嘅入球荒，而喺踢嗰球十二碼之前冇耐，重俾對手撞到頭破血流，出場包紮好後先入番場；好彩佢當時冇頭暈，一腳射入。我求大俠替佢高興時，諗到佢唔通要撞「紅」掃烏氣？點都好，希望「阿祖」繼續「紅」運當頭，入多啲波喇！
林柏特置豪宅敍天倫
英超球隊車路士嘅中場林柏特，雖然以前曾被報道參加集體性派對，不過，佢近年已洗心革面，𠵱家重成為車仔同埋英格蘭國家隊嘅主力；佢最近更斥資三百五十萬鎊（約五千二百四十萬港元）買咗喺球會附近一幢四層高嘅高尚住宅，打算同埋屋企人同住，認真孝順。