老董就快走頭，所謂樹倒猢猻散，噚日出席立法會財經事務委員會，俾阿董及松松呃咗上沉船嘅問責局長馬時亨，少不免俾議員攞嚟玩。湯家驊話，政府近日提出成立監管核數師嘅財務滙報局，佢認為唔符合政府話要縮減架構嘅原則，但係既然就嚟換特首，馬局長有冇得留低都成疑問，唔知呢啲新政策會唔會變。劉慧卿又話，呢個題目正在諮詢公眾，希望諮詢完之後政府再來立法會滙報，但唔知到時馬局長重喺唔喺度。
雖然俾議員揶揄，但肥仔馬照例笑笑口，冇發老脾。有知情人士同八方講，肥仔馬同曾司長感情好好，冇咁容易被叮走。唔怪得肥仔馬可以處變不驚，噚晚繼續出動，出席證券商協會新春酒會，依然滿場飛。
噚晚證券商協會新春酒會，八方見到新獲續約三年嘅證監會執行董事林張灼華，自然要打吓招呼。林太揸住個LV手袋，不知幾搶鏡。林太獲政府重用，但佢上司沈聯濤將會喺九月離任，都係嗰句，「有人辭官歸故里，有人漏夜趕科場」。
傳真︰2623-9278
電郵︰