市區住宅炒咗一年幾，價錢已經唔算平，反而新界樓都重幾吸引，加上銀碼細，炒味開始轉濃，好似粉嶺中心，有件貨一年轉手四次。
中記馬刻銘話，K座低層二室，六百五十三呎，有裝修兼望唔到墳場，舊年三月以一百一十三萬成交，四月以一百二十二萬易手，今年一月中以一百三十一萬沽出，今個月再以一百三十九萬「摸出」，賺八萬，呎價二千。
聽講，賣方擺明係買嚟炒，所以交吉期有成三四個月，計落重有時間可以再「摸」多轉。買家係居屋客，諗住自用，但若果有客畀多十零萬，可能肯割愛都未定。
馬刻銘話，粉嶺中心與粉嶺名都，因為近火車站，同埋交投多，都係熱炒屋苑。佢透露，呢區單位，一年轉手兩三次，情況都幾普遍，炒家一般要求三至六個月交吉期。
新鴻基地產搞嘅新地會，邁向第十年，會員逾二十萬。新地會董事總經理May姐劉美梅話，呢九年間，久唔久都有買咗新地樓嘅會員呻，點解佢哋咁捧場，所享優惠同其他會員冇分別，希望有着數。
May姐覺得有道理，於是搞個「星級會員」計劃，只要係新地樓業主或租客，就升格做星級會員。未來一年買新地一手樓，可以享受到十項大獎，包括樓價打折、優先內購、獲贈管理費、旅遊大獎，以及新地十八個商場現金券等等，總之衣食住行都有着數，而且着數一定比普通會員多。
投資者尹栢權，舊年尾用兩億買入銅鑼灣小南國狀元樓，改名銅鑼廣場，上周末起拆細做三百件細舖摸售。蘭西噚日路經糖街小巴站側，見有幾十個經紀兜客，重話賣出成百件。
不過，搞手中記負責人話，批貨未正式開售，只係收住票，試吓市場反應，價都未定實。佢話，成批可以套現五億。以成個場兩萬二呎計，近兩萬三蚊呎。
經紀向蘭西提供嘅價單，開賣緊嘅一樓五十個舖，價錢由九十幾萬到四百六十萬，二樓七十四萬至三百二十萬，最細只有三十幾呎，即係實用唔夠二十呎，最大都係百幾呎，可以做乜生意，都幾考功夫。
唔做生意嘅買家，可揀兩年七厘租金保證，價錢畀貴七點六個巴仙，着數與否，見仁見智。
上月借錢買樓人士，好多攞到低息，六成九人只須畀P減兩厘八、甚至更平；舊年十月，只有不足一成一人做到咁平。有啲收入唔算多嘅家庭，為咗趕上車，重加長還款年期，等每月供款輕啲；而一月借錢買樓人士嘅平均還款年期近二十年。表面睇，供樓好似易咗，但係就隱藏危機。
對於置業人士「借到盡」，經絡盧子勇認為，加息周期將開始，手頭資金充裕嘅，可以透過重組按揭減低負擔，但上車客最好預留「水位」，千祈唔好「借過龍」。
以借一百萬，還二十年，利率P減兩厘八計，若果利率升一厘，全期利息支出就增近半，加兩厘就會多逾倍，都咪話唔重皮。
電郵地址：
