是日恒指最高13872，升過141點，埋單計只有41點進帳，唔多好睇。長和孖寶成為最失色嘅藍籌，總共拖低恒指24點，似乎有啲有心人搞住兩隻重磅嘢做緊嘢。長實（001）收70元，已經相當接近1月份69.50元嘅低位，而1月份恒指低位係13320（昨日13771）。老李孖寶有可能先行見底。
新地C輪：新地（016）最高71.50元，平收70.75元。中期盤數靚，暫時叫好唔見座，遲吓個市好番，有機會跑番快些少，喺麻麻哋市況中趁低收集C輪。遠期正路之選係3912，8月尾到期，輪價45.5仙，溢價5.5%，槓桿率15.6倍（有效8.6倍），引伸波幅22.3%。正股派末期息0.70元，下周三除息，3912係遠期輪，對除息因素冇咁大反應。4643亦係熱門新地C輪，上落快啲，昨日最高31仙，最低25.5仙，正股高低1元，隻輪波幅則達兩成，正股除息因素會令佢哋嘅溢價由2.6%提高到3.6%。
太AC輪：太古本周四派全年成績表，太A（019）升2格，收64.25元。成績表見人之前若見回落，執些少C輪3607。隻輪7月杪到期，輪價38.5仙，溢價5.6%，槓桿率16.7倍（有效8.6倍），引伸波幅25.8倍。有平貨至上車，冇平貨算數。
利豐C輪：利豐（494）升0.50元，收13.60元。C輪4670升21%，收1.52元。
隻輪6月初到期，平水，槓桿率8.9倍（有效7.2倍），引伸波幅26.5倍，數據仍靚，不過冇用，全日得22000份成交，冇計，街貨（上周五）得0.06%即係46800份，有貨喺手嘅炒家可能重少過六合彩二獎得獎人。
章盛