成功轉型做演員嘅日本性感女星MEGUMI，近排喺女星松山鳥菜菜子同男星江口洋介套新劇《急救群英》第三輯入面扮演護士，MEGUMI喺一班實力派演員面前，演技大受考驗。
不過，MEGUMI並冇就咁收埋驕人身材，最近佢啱啱推出咗最新寫真集以及DVD《digi+KISHINMEGUMI》，喺攝影大師篠山紀信嘅鏡頭之下，MEGUMI再次身材大解放，令男fans大流鼻血。
MEGUMI雖然拍過唔少寫真，但難得搵到攝影大師揸機，所以一啲都唔錫身，盡情騷佢嘅Hcup上圍。雖然MEGUMI生得唔算靚女，但偏偏篠山紀信就話鍾意佢嘅呢種有如美少年嘅中性樣貌，重話要表現佢另類魅力。睇見一頭亂髮嘅MEGUMI坐喺床，再加上一雙睡眼惺忪、啱啱瞓醒嘅表情，的確與平日成個儍大姐咁嘅佢與別不同。MEGUMI更用床單輕掩半身，露出滑溜肉背，引死fans。
另外，MEGUMI重着住吊帶上衣食西瓜，西瓜汁重滴滿全身，意識非常大膽，不過咁凍重食西瓜，本來睇到熱血沸騰嘅fans會唔會降到溫呢？