傳聞會獲大股東注入澳門賭牌的嘉華建材（027），昨日連同阿媽嘉華國際（173）一齊停牌，重話涉及非常重大交易。小初心諗，呢個消息傳咗成年咁耐，睇怕今次會係堅料啩？
受到嘉華兩母子停牌影響，唔少濠賭股亦受惠上揚，家姊嘅信德集團（242）升4.73%，收7.75元，成交股數1925萬股，金額1.48億元。至於細佬嘅新濠國際（200）亦升1.23%，收16.50元，成交股數150萬股，金額2484萬元。
不過，經紀陳唔係咁睇，佢話信德同新濠都係澳門龍頭股，豈會咁易受其他股份影響，雖然澳門概念近期已由熱鬧歸於平淡，但無論信德抑或新濠，皆各自有新發展。
江湖傳聞，信德夥拍英國維珍航空同澳門航空一齊搞廉價航空一事已經如火如荼，隨時會在短期內落實。至於新濠亦唔差，除咗舊年搞開的六星級酒店外，據聞亦傾緊在路環搞另一間酒店。
慕容小初