新特首問題拖咗成個禮拜，好快會有結果，一旦正式拍板，無論人選或者任期是否全人類滿意，股市都係少咗個不明朗因素。情況如去年12月領匯（𠵱家唔使寫埋個冧把）拖住未能上市前，個市陰陰沉沉，到咗正式話唔上得市，個市即刻彈上去。加埋恒指上禮拜已經散咗426點，再加埋美股個勢唔講得笑，港股應該已經短期見底，隨時會有似樣反彈。揸C輪者唔使輸得咁多。
恒指C輪：博個市反彈，買恒指C輪，大把好揀，睇吓炒家係搏殺抑或冇咁搏殺。
3505與3577都係5月底同時到期嘅恒指C輪。3505輪價8.3仙，溢價1.7%，槓桿率38.5倍（有效18.9倍），引伸波幅14.6%。3577輪價7.7仙，溢價1.0%，槓桿率29.2倍（有效16.7倍），引伸波幅15.1%。3505波幅會大過3577。想冇咁刺激，可以揀3775，7月尾到期，輪價15.9仙，溢價2.8%，槓桿率19.2倍（有效10.8倍），引伸波幅18.7%。
中企C輪：大市反彈，國指都有機會好番啲，買中企指數C輪，正路之選係3716，6月尾到期，輪價14.7仙，溢價2.9%，槓桿率16.8倍（有效10倍），引伸波幅22%。講成交金額，3782單日有21球，大好多，但溢價上到8%以上，槓桿率近43倍，炒非常短線可以諗吓，但要提防輸起上嚟會傷好多。炒指數輪，恒指好過中企。
中移動C輪：中移動（941）亦有反彈之機，揀C輪短炒，3826數據靚，7月到期，輪價18.7仙，溢價4.3%，槓桿率13倍（有效8倍），引伸波幅24.6%，缺點係交投唔多。
章盛