好多市民都引頸以待嚟緊月中公布嘅財政預算案，好想知道財政司司長唐英年會唔會有「糖仔」派，等平民百姓可以真正分享經濟復甦嘅成果。
至於社會服務團體，亦都好關注福利開支究竟係繼續閂水喉定係唔使再制水。但係「財爺」已經明言，政府重有二百幾億官債要還，睇嚟大家只可以抱住審慎樂觀嘅態度。
不過社福團體又唔需要太擔心，因為香港出名多善心人，對社會好有承擔。正如蘋果日報慈善基金背後一群善長就係好好嘅例子。基金每年都會有四次大型撥款行動，善用讀者捐款，資助社福團體推行扶助弱勢社群嘅計劃。
○五年第一季申請已經喺早前截止，基金一共收到三十多份計劃書，計劃援助嘅對象包括：貧困學童、患病長者、視障人士、南亞裔婦女、低收入家庭、喪親長者等等。申請撥款金額由幾千蚊至三十萬不等。
蘋果基金轄下愛心基金委員會已經定喺本月二十四開會審議所有計劃書，預計月底至下月初就會有結果，屆時成功申請嘅團體將獲個別通知。
暖流熱線
電話：29908688
傳真：23702192
電郵：
網址：