外圍股市大升，美股杜指上周五升107點，收10962，逼近11000點大關。過去6個星期，杜指累積上升5.27%，恒指則由13481升到上周五收市的13730（其間恒指曾一度升上14273的高位），升幅僅1.84%。
單係上周，杜指有90多點進帳，而恒指則下跌426點。美股氣勢如虹，理論上會為港股帶來支持，但現時美股同港股正殊途，一個上升，一個下跌，港股短期跌勢或會略為放緩，但始終係要繼續尋底。
有大行內部報告認為，恒指13500的支持力應該經得起考驗，但若果跌穿，則可能要跌到12800水平才守得住。事實上，大戶造淡，當然有目的，今個月實在有太多窩輪到期，只要每1隻大藍籌質低兩三元，好多窩輪都會變成廢紙，發行商就賺到盤滿缽滿，所以3月個市都幾難會好。
不過個人認為，恒指若真係跌穿13500，除非有大壞消息跟尾，否則直插落去12800的機會唔會太大，恒指在13200至13300水平應該守得住，家吓外圍股市咁好，而中國政經形勢又冇事，只係香港特首繼任問題或會有小風波，照計投資氣氛唔會太差。
中信21世紀（241）大強勢，股價由低位回升上2.675元，重上10日同20日線之上，暫時形成的大圓底收集區，上阻力係2.85元，升破而又有大成交配合，短期上升目標指向3.60元。
21世紀股權證（2963）上周五高收0.85元，買家全力搶貨，本周三最後買賣，加上0.1元認購費，照上周五的股價計，窩輪已有35%的溢價，顯見窩輪的買家對21世紀的後市極為看好。
21世紀早前收購的質檢網，籌備工作已進行如火如荼，有消息在月內可開通。中國商品登記以千萬計，而年營業額又以百萬億元計，質檢網日後的收益，係值得寄予好大期望。
中國科技集團（985）大股東趙志剛最近不斷在市場增持合共1.2億股，唔排除趙氏旗下佔51%的石家莊雙環汽車會有進一步的注資行動（現中科佔雙環25%權益）。雙環正處於高增長期，保守估計04年全年盈利可達2億元人民幣，比前大增6倍，惹人憧憬。
郭兆誠