上周五大市急跌，跟住又話秋官有新劇要上演，聽落認真一頭冷水淋，但經紀黃就繼續堅持買股唔買市，認為揸優質好股，風險點都細啲。
由於近排工業股抬頭，所以今日經紀黃又係推介工業股，佢話黛麗斯（333）公司管理好，生意又夠多，現時管理層諗緊計提升廠房設施的生產能力，有利公司接單。黛麗斯的生意雖以出口為主，但最近亦傾緊收購大陸一啲有自己品牌的胸圍產銷商，銳意向大陸市場進軍。
黛麗斯係本地市場上獨一無二的胸圍製造商，早排所公布的業績相當靚，半年盈利9210萬元，比去年同期上升41%，股價即刻有反應，好快就穿越2元水平。雖然近排股價升咗唔少，但聽幕後人士話，短期應該唔會搞批股集資，唔怕股價因配股活動而被拖累，可以放心捧場。
黛麗斯上周五最高升過去2.50元，收2.375元，冇起跌，喺跌市中表現算係咁，成交股數628萬股，金額1526萬元。
慕容小初