男子組合Shine成員黃又南早幾日突然喺跑馬地養和醫院出現，嗰日見佢一臉病容，相當憔悴，原來佢因為哮喘病發作，所以要求醫診治。
嗰日下晝四點零鐘，又南喺女助手陪同下坐保母車去到醫院，佢一落車就入咗急症室，由女助手幫佢去登記，無厘精神嘅又南就自己坐埋一邊發呆。大約過咗半個鐘，又南睇完症就即刻上番保母車離開醫院。
事後又南同馮仁昭講，嗰日係因為哮喘病而去睇醫生，佢話自細已經有哮喘，試過針灸，又試過食藥，但都冇法根治。上個禮拜天氣寒冷，又南一直開工拍電影《AV》都冇事，點知嗰日咁啱唔使開工，佢就即刻哮喘發作，所以佢話自己都係辛苦命，做緊嘢就好地地，但一休息就病，真係無奈。
Shine早排加盟華納，但另一成員徐天佑喺舊年試過喺台灣中暑暈低，而又南又有哮喘，睇嚟佢兩個都要好好保重身子，否則點應付轉會之後出新碟重振聲勢呀？
陳慧珊前晚出席《擊情》首映時，自爆早排返美國探望家人時有豔遇，陳慧珊話當時佢陪屋企人去睇屋，而帶佢哋睇屋嗰個外籍經紀竟然主動約佢食飯，但陳慧珊話好耐冇返美國陪屋企人，寧願陪家人，所以婉拒咗對方邀請。
楊恭如日前到訪上海長風敬老院，佢重自掏腰包購買圍巾帽子，送給在場老人家，其間還牽着一名婆婆嘅手，承諾日後有空，必會再嚟探訪。恭如話希望喺能力範圍之內，能替老人家添日用品，佢又勸喻做人子女嘅應多抽時間陪伴父母。
台劇《流星花園》喺日本播出後，日本大型唱片舖都見到F4嘅台版專輯出售，F4會喺今個月二十四號正式進軍日本，推出單曲。而周渝民（仔仔）重獲選為日本一百貨公司嘅白色情人節活動代言人，位於澀谷嘅分店將會喺十一號開始舉行「流星花園．F4World展」，仔仔亦即將去日本展開宣傳。
張文慈噚日去咗九龍灣展貿出席《第十屆金紫荊獎》頒獎典禮，佢着咗條吊帶紅裙現身，令人眼前一亮。近年佢主要幫亞視拍劇，好少拍戲，所以佢嘅出現，都令大家覺得奇怪。馮仁昭問佢點解會嚟，佢話：「金紫荊頒獎禮係由亞視播映，咁公司想旗下藝員可以嚟支持呢個盛會，咁公司叫到，我梗係要嚟撐場。」
