阿董由北京回港，與接班人兼新郎哥煲呔神秘會面，阿董七年半禍港鬧劇，終於告一段落！
阿董「辭職」內情，亦逐漸水落石出！呢幾日，中方透過不同渠道，大力否認阿董係遭到壽爺炒魷，不斷強調，係阿董自己唔撈，千祈咪監壽爺食死貓！
實情係點？原來係阿董自己「玩辭職」，今鋪終於玩大，搞到弄假成真！事緣當日澳門訓政，「有人」遭到壽爺閉門斥罵，跟住，阿董重公開講，係壽爺對佢治港成績「高度肯定」，佢感到十分「驕傲」！中方見到，不停搖頭，迫不得已，再由紅曾在國外補多句「還有不足」！據聞，事後有人曲解紅曾話意，不過自己個心，就覺得炒魷指日可待，於是實行賊佬試沙煲，口頭提出請辭，睇吓壽寶曾三公，會唔會挽留！
點知今次上頭一聲唔該，欣然笑納，即時安排風光大葬，原來亦一早同接班人有晒默契搭通路，於是就搞到弄假成真嘞！
呢項絕密，連本地土共都懵然不知，以為阿董「升職」做政協主席，即是「中央」對特區升格重視！亂咁解畫，點知擦鞋擦着對冇着襪嘅赤腳，不但壽爺隻腳黑晒，連阿董亦即時樣衰！老左一向自稱有北京天地線，今次再次證實，老左啲「消息」，水過三流馬評人啲山埃貼士！
權威人士透露，阿董玩「假燒炭」，實在好儍，因為江太祖去年亦玩過呢一招，亦一樣玩大！壽爺一早布下天羅地網，阿董想玩嘢，點夠壽爺玩！重想屈中央炒佢魷魚，話係壽爺扼殺港人治港？壽寶曾三公，當然唔係細路！
所以根本就係一場宮廷政變！阿董終於要執包袱，咁就搞到自由黨民建聯陣腳大亂，諗住狙擊曾蔭權，想班師勤王，都冇機會嘞！
董曾會談，理應商討交鎖匙事項！煲呔上台，要有阿董誠意合作！好多人擔心老左作反篤背脊，煲呔上陣之後未必壓得住個場，其實唔怕吖！阿董當年搞唔掂，都賴晒前朝港英埋地雷！煲呔治港，手風若然唔順，大條道理，咪話係老董聯同左共埋咗好多地雷畀佢歎囉，唔怕㗎！
（圖）老董（右）見完胡溫後由北京抵港，搭車返嘉慧園屋企，一臉疲態。
區民傑攝
傳真︰2623-9278
電郵︰