意大利佬永遠唔會做蝕本生意，日前大名鼎鼎嘅AC米蘭醫療實驗室，仗義出手幫車仔醫番好洛賓，等佢可以喺周中歐冠盃對巴塞隆拿嗰時上陣。
AC點解「咁好死」？表面原因有兩個，車仔老闆阿巴莫域治同AC老闆貝盧斯科尼可謂Friend過打band！加埋AC想買斷借過嚟嘅基斯普，幫吓手唔出奇。另外，AC負責嘅醫生咁講：「咁樣幫競爭對手治療球員係唔常見，但係呢個就體現咗體育精神可貴之處喇！」嘩！咁有仁有義！
背後原因好簡單啫！球迷們重記唔記得AC同巴塞喺分組賽各勝一場，次回合巴塞響主場打到AC爬晒地贏二比一？試問除咗上季歐冠盃作客拉科輸○比四，意大利佬有邊次輸得咁丟架？無錯喇！AC呢一招就叫做「借刀殺人」，借車路士之手解決巴塞呢口眼中釘！
洛賓今季對車仔有幾重要，唔使我多講。𠵱家個「荷蘭仔」就鬼打都冇咁精神，車仔領隊摩連奴重話：「佢好番喇！但可能打唔到九十分鐘。」呢次巴塞隆拿真係多得AC唔少喇！話晒列卡特都係半個AC人呀！咁搞法毒唔毒啲呀？
講開車仔，咪睇摩連奴外表好「招積」，估唔到佢好怕老婆，三更半夜老婆一句話「老公！我要煲煙！」摩連奴就即刻踢住「人字拖」出街買。佢自己亦講過「除咗老婆，冇人可以吩咐我做嘢。」聽講佢今個月會應邀去以色列宣揚和平，睇怕都係經過老婆批准先答應嘅啫。
今晚主場鬥保頓嘅曼城，領隊基瑾一般相信教埋今季就要走人。有見離隊在即，基瑾為保「愛將」們飯碗，諗住趁呢段喺曼城嘅最後時光，落力幫過氣猛將科拿爭取一紙新合約，認真有情有義。不過，報道入面淨係話科拿有望再續新約，唔爭在幫佢老友麥馬拿文爭取埋啦。
「13」對於好多人嚟講係個不祥冧把，不過對紐卡素領隊桑拿士嚟講就唔同。之前領軍未贏過母會利物浦嘅桑拿士，前日第十三次領軍再鬥母會終於贏波。最估唔到係幫桑拿士掃烏氣嘅建功者，係同佢不嬲傳不和嘅羅拔。唔知呢次羅拔建奇功，會唔會改善佢兩個之間嘅關係呢？
曼聯翼鋒基斯坦奴喺球場度左扭右扭，技術了得；但原來佢手車認真麻麻，上個禮拜啱啱先炒完車，事後怕瘀，唔敢講畀班隊友聽。聽基斯坦奴的朋友講，雖然呢位曼聯翼鋒嚟咗英國搵食幾年，但係一坐喺架車度，佢就慌失失，重試過撞過幾次車㖭，都算失威囉。
逢周一至周五見報