又一年冇得睇晒奧斯卡頒獎禮直播。舊年又係咁，前年都係咁。舊年就由頭開始直播，播到某個時候告一段落，之後播教育電視；今年直播時間有更改，於是先播教育電視，正午才開始直播頒獎禮的剩餘部份。
無綫有關人士舊年已發表聲明，並唔係電視台唔想原汁原味直播，而係政府有條例一定要播教育電視，真係激死人！
奧斯卡是全球盛事中的盛事，多少地球人對牢電視觀看，偏偏香港落後地冇直播。在奧斯卡當日，香港正舉辦一個國際級的珠寶展覽，數以千計買家來自世界各地，大小酒店絕早爆滿，試想想買家一早到會展中心做嘢，家眷則諗住安坐酒店房觀看奧斯卡，怎知遙控㩒爆發覺冇直播，「Whatthehell?!Whatthehell?!」之聲一定響徹尖沙嘴，這些外國人心裏心裏一定有個謎，又話香港係甚麼國際大都會，連奧斯卡直播都冇，應該係一個流嘢大都會。
特區政府一直話要點幫香港電影工業，點培訓新一代接班人，培訓先由意識開始，有關高官們都咁唔尊重電影工業裏面嘅盛事，細路又點會睇得起電影?!真係唔明教育電視有乜咁急切性一定要喺嗰日播，就算真係要配合全年課程，難道就唔可以早一年部署定奧斯卡當日播少一集？別給懶惰一個藉口！
希望見到老師跟學生們一起在課堂內看奧斯卡，中、英文老師可以教學生欣賞嘉賓的講詞，美術老師可解釋舞台的設計或入選電影的品味，歷史老師可講解入選電影的歷史背景，太多太多的可以一起分享，甚麼「求學不是求分數」、「目標為本」式教育，究竟是怎樣的一種教育?!