二手暢旺，但係居屋未受惠，上個月居屋二手買賣（包括第二市場同自由市場成交）只得四百二十二宗，比一月五百四十二宗，減兩成二，係一年半新低。總值減少兩成一，唔夠四億半。
睇番十大熱門居屋苑嘅成交，火炭穗禾苑以十六宗佔第一位，比一月多一成四。第二位係馬鞍山富安花園嘅十五宗。反而一向買賣活躍嘅九龍灣麗晶花園，就表現疲弱，只得十三宗，僅僅可以保住個季軍席位，比起一月重勁減四成三。
利嘉閣周滿傑話，隨住九成半按揭普及，以往首期只夠買居屋嘅準買家，都紛紛轉投私樓市場，搞到居屋二手買賣大不如前。加埋政府宣布，喺○七年恢復出售居屋，預計今個月嘅登記量重會下跌，幅度有機會超過兩成。
灣仔會展本周五舉行「2005世界地產博覽展」，睇吓啲參展國家，有啲可能你諗都未諗過，話係世界性都冇乜錯。據講，呢個博覽展共吸引超過十五個國家，多間主要地產發展商、代理同相關公司參展。
睇番參展商背景，加拿大、澳洲同英國見慣見熟，但係巴哈馬、塞浦路斯、土耳其、保加利亞同捷克共和國、係咪好冷門；至於貝里斯同桑吉巴，聽都未聽過！
主辦機構DubaiShows董事會主席MikeBridge話，今次共有逾千個售價六十五萬至三百五十萬美元嘅單位，在港推出，另外，重有杜拜發展商IFAHotels&Resorts首度嚟港，總投資達一億美元嘅豪宅項目。
「世界地產博覽展」曾喺科威特、新加坡、阿布達比、蘇黎世、波士頓、杜拜、巴林、多哈同上海舉行過，未來會去印度、俄羅斯同英國舉行。
農曆新年過後，消費市場進入淡季，為咗幫助商戶做多啲生意，信和集團旗下柴灣藍灣廣場、大角嘴奧海城、尖沙嘴中港城、屯門市廣場以及黃金海岸商場，向喺四月前生日嘅顧客，免費送贈生日籃，裏面有果汁、糖果，餅食同埋朱古力等，總值近四百蚊。
另外，以上商場內部份食肆，都會參與送出優惠。
當然，啲壽星仔都要喺商場內，消費滿指定金額，至可以攞到呢個生日籃，咁樣，商戶就多咗做生意嘅機會啦！
樓市升勢持續，資深投資者黎汝遠，堪稱大贏家，之前買入好多新盤短炒，已經賺咗唔少，趁低水買入嘅二手樓鴨脷洲海怡半島，一樣賺大錢。
中記陳美玲話，黎汝遠喺舊年底，以八百四十萬買入海怡九座頂層G室，連天台，面積一千三百幾呎，連四百七十幾呎天台，剛剛以九百三十萬售出，賺九十萬。
今次呢個單位以摸貨形式出售，確實係黎汝遠嘅拿手好戲，因為佢買新盤單位，都特別鍾意以特長成交期付款。
屯門區住宅涉及銀碼細，因此炒風都幾勁㗎，祥益地產營業董事謝澤銘表示，投資者同炒家，出貨入貨相當頻密，每日都有幾宗呢類成交，好似大興花園，二期七座中層C單位，五百八十三呎，以一百一十萬沽出，投資者唔夠一年，賺二十五萬，件貨升值近三成。
至於同座中層另一個C單位，就由投資者買入，成交價九十三萬。聽講，買家係連樓都未睇過就扑槌，可見對後市充滿信心。
謝澤銘話，除咗大興花園之外，區內嘅居屋屋苑，例如悅湖山莊以及兆山苑，都係炒家樂園。
電郵地址：
