美國著名搖滾樂隊LimpBizkit主音FredDurst，早排俾人盜取儲存喺電腦入面嘅資料，將佢同一名俄羅斯模特兒MashaNovoselova交歡嘅片段放喺網度任人下載，搞到Fred好㷫。佢喺上星期四透過律師入稟法院，向有關網站索償八千萬美元（約六億二千四百萬港元）。
大約兩星期前，有人將FredDurst儲存喺電腦入面、相信係用手提電話拍攝嘅私人春宮片段放喺網上任人瀏覽。從片段所見，全裸嘅Fred正在同Masha做愛，呢段片段長達三分鐘，其中有兩分鐘重係Fred下體大特寫。據知𠵱家有超過一百個色情網站提供呢個片段俾人免費下載。
由於事態嚴重，Fred已經入稟法院，控告擺呢個片段上網嘅有關網站，佢話當初拍呢段片段唔係諗住俾人睇，點知竟然有人未經佢同意下放咗上網，實在令佢好激氣。其中一個被控網站Gawker嘅創辦人尼克丹頓（NickDenton），聲稱佢哋喺Fred律師採取行動前三日，已經將片段移走。另外，早排ParisHilton嘅電話資料亦被竊，負責Paris案件嘅調查員，亦會深入調查Fred呢件案，睇吓雙方有冇關連。