中大因為教學語言風波，校園近日氣壓好低，但前日校友日，仍然有好多校友重返母校，當日節目亦安排得好精采，好似李天命個講座，成個講堂坐到爆滿，再開多一個教室睇電視轉播，一樣座無虛設，演講時間由一個鐘延至兩個鐘都未夠喉，可能大家知佢七月退休，都珍惜得來不易嘅機遇，聽吓大師教誨。
李天命講乜？當然離唔開「思考方法」；至於「不會思考方法」，佢就話留番畀校長講喎。咁思考啲咩？當然係最熱門嘅「國際化」。李天命話國際化呢個詞語唔係幾好，事關唔清晰，正如「公關場所」，究竟係裏頭啲小姐來自各國係國際化，定啲小姐被各國爭相挖角至國際化呢？所以佢建議唔好叫國際化，應該叫「春威化」，因為夏威夷出咗名國際化，咁佢哋「夏威」，我哋「春威」，咪威過夏威夷！
台下笑到碌地之際，有人舉手問：「咁點睇中大國際化呢？」大師答曰：「冇眼睇！」
傳真︰2623-9278
電郵︰