日本新一代性感女神井上和香早前為日本雜誌《WEEKLYPLAYBOY》去咗台灣同北海道拍攝寫真，不過井上今次拍攝寫真認真唔好受，雖然喺台灣食小籠包好happy，但之後就要喺冰天雪地嘅北海道瞓雪影相，真係搵食艱難咯！
井上𠵱家喺日本忙到不可開交，今次難得有機會出國當然開心，但只可以喺台灣逗留四日三夜密密開工影相。井上除咗着上多套性感比堅尼大晒豐滿身材之外，佢亦入鄉隨俗，着上鮮紅色旗袍。井上重好醒目咁忙裏偷閒大擦小籠包慰勞自己，佢又話希望下次再去台灣，可以有機會試一試腳底按摩喎。
喺台灣happy完後，井上飛到北海道繼續開工。井上喺冰天雪地嘅北海道着住比堅尼影相，凍到面都青埋，要即時走入溫泉歎一歎驅寒。另外，呢批寫真以及井上拍攝時嘅花絮同訪問，亦會放上雜誌嘅收費寫真網站內，乘機再賺一筆，fans只要付出約一千日元（約七十五港元），就可以欣賞到未曝光嘅照片，以及下載井上嘅螢幕保護程式。