新世界數碼（276）上年11月尾宣布2供1，每股伸手價0.2元，新股嚟緊星期五買賣，星期三開始要昅住。
新數碼上年7月宣布20合1，連埋呢期供股，配發最多1.45億股計數，新數碼已發行股數講緊不過3.46億股，況且，現水位亦係2000年科網潮以來低位，初步睇落，好乾身。又新數碼家陣揸住金鐘美銀中心地下及地庫物業，物業資產底厚，經呢勻供股後，每股資產值亦有0.51元，大有折讓，向上兼有指標作用。
再講，呢勻供股，大股東魯連城拍心口包銷，雖則集資數額話多唔多，講緊3000萬唔夠，但若然全世界停手，大股東履行包銷，權益會增見39.87%。咪忘記，家陣新數碼重係用緊「新世界」牌頭，若然股東權益有突變，市場自然有多多聯想。嚟緊星期三，係新數碼供股結果揭盅日子，假定權益無變，憧憬冇着落，新數碼現水位價殘兼乾身，一樣值博，上NAV0.51元位，講緊80%回報。
中策（235）最近1年跟唔上德祥系同仁，股價大落後，又講兩點。第一，中策大股東上年10月獲第三者洽購中策股權，由去年10月開始，到12月及今年1月，仍舊用「未到最後階段」字眼。但到上個月，中策就話已經進入具體階段，意味中策易主一事，進入最後倒數。第二，中策每股資產值講緊1.6元，現價折讓6成過外，再講，大股東若然現價割愛，現兜兜不過兩億幾，好似到喉唔到肺。照牌路推算，唔應該現價位就行人止步，細細注，博有筍價，應該無妨。
錢雋