好多人心目中賀歲片只有《功夫》一齣！《神經俠侶》一月底上過畫？唔知！當時影評高度評價？係咩！今個星期啱啱出碟？買唔買得過呀！《神》係香港近年鮮見言之有物的電影，故事內容好警察、好真實、好香港，兼且有血有淚，細心啲睇「真係嗒落有味」！香港電影，值得撐！
記者：朱崇德
真戲迷者，戲院睇完《神》都等緊佢幾時出碟，估唔到落畫「未足月」已上貨架；但網上戲迷媽聲四起者是「出得咁求其」，儘管聲畫表現OK，但齋戲冇Making，令人好生失望！點條明路畀大家，官方網站內有一段10分27秒「製作特輯」，雖然製作簡陋，但已經叫影迷者止止渴。
地道警察故事
戲名所累，好多人都誤以為《神》係一套胡鬧賀歲喜劇！抱住呢個心態包你失晒預算。《神》是以灣仔為背景的小小巡警故事，故事開首講述「老散」傑仔（陳奕迅飾）帶小師妹廖得男（容祖兒飾）拍拖更。一個老油條抱持「多勞多失」、一個初出學堂過度活躍。初睇戲碼好似陳腔濫調，但如果家中有人當差，就會發現好多情節都出自真實資料搜集，甚麼「死貓」當DeadBody，帶出三大行Beat規條「唔好亂響機、唔好亂落簿、唔好亂掹槍」；睇完空中飛人（跳樓），新仔從此見到肉醬意粉都會嘔；再加上不時加入一啲老差骨嘅抵死打油詩，真係非常差佬，非常地道，睇得人會心微笑。
此外，另一令人深思處，是不論你已經做到滑晒牙，還是發現自己空有一番熱情但無力正乾坤，戲中你都不難在陳、容身上發現自己的影子，如何在生活及工作的磨難中「鞠躬盡瘁」，這個戲中主題亦好值得人深思。
