董建華被請上神枱，黯然引退，爛尾落台，令人聯想到，如果係自己老公被燉冬菇，會是甚麼效果？
我不是1A，用老婆角度睇，老公冇得撈，無官一身輕，有多多時間陪仔玩，一頭半個月就飛離香港，南美、非洲、北歐、南北極以至神州大地任縱橫，不知幾爽。會不會自我感覺無面子？我一向面皮厚，側側膊，唔多覺。老公冇得撈，闊太遠離我，交際應酬霎時叫停，耳根當下清靜晒，是大雙贏的好事。
如果係老竇冇得撈，他已經七老八十，早應該湊孫享福，無謂蹚政治暗湧的渾水，及早上岸，明哲保身。老竇嫌生活苦悶的話，慫恿他去維園做阿伯。對政治意興闌珊唔想掂的話，安排他返大陸娶二三四奶又點話。人大政協有幾個老婆，天經地義，退休政治老人，值得學習。
不是老公，不是老竇，是你個仔冇得撈，又唔同講法。做人阿媽，永遠認為個仔未長大，難免擔心，怕他自殺。不過個仔做了七年半，日日七十一，日日遭人媽媽聲問候，跣到七彩。這個阿媽，時時刻刻肉赤眼眉跳，個仔唔做，直情還得神落。專家教落，養兒係用來防老嘛，個仔唔做特首，背脊不怕被人篤花，條氣順些，命都會長些少，阿媽才有望享仔福。
假如是你老友唔做特首，恭喜你，終於失而復得有番個老友。
假若董特首是你的情人，他政途愈轉折愈有可觀性。假使將來掟煲，你出書爆料，峯迴路轉，大把內幕，不愁銷路。