港股過去一星期跌咗四百二十六點，有人提八方，股市明燈嘅鄭少秋又有劇推出，佢喺十四號會有新劇《御用閒人》出街。不過，去年十月二十五日秋官套《楚漢驕雄》第一日出街，港股雖然即刻跌咗二百點，但最後埋單計數，恒指升咗超過一成，於是有人話，秋官效應已經唔再靈驗。
不過，八方翻查過里昂舊年三月發表嘅嗰份秋官效應報告，發現效應並唔係次次靈驗，好似九五年喺亞視播嘅《香帥傳奇》，港股不跌反升。最有趣嘅喺當時同呢套戲打對台係無綫播嘅戲，都係由秋官主演嘅《男人四十一頭家》，但呢套戲埋單，港股就跌咗百分之四。
第二次唔靈驗嘅就係○三年十月喺無綫播嘅《非常外父》，個市一樣冇事，呢兩年秋官十月播嘅戲，恒指都不跌反升。至於舊年三月播嗰套《血薦軒轅》，其間港股跌咗成千點，埋單計數，重跌咗接近百分之九㖭！今次呢套《御用閒人》又係喺三月播，唔知歷史會唔會重複呢？不過，山雨欲來風滿樓，上個禮拜港股已經跌咗百分之三喇！
傳真︰2623-9278
電郵︰