跟紅頂白，世態炎涼，乃永恒不易之道理。曹仁超筆中之胡寒暄行將代替江握手，於是各方陣營紛紛部署，一啲趕住同Ｄ先生（即當奴蛇，胡寒暄是也）修好，一啲密謀上京活動，力爭補任特首之任期為兩年，唔係五年，等到○七年再與Ｄ先生拗過手瓜。如此一來，本來會有四五隻馬競逐嘅「特首盃」，只得番兩隻馬砌過，Ｄ馬房搶閘成功，領先十個馬位，Ｈ馬房眼見後上不及，要求賽馬董事研訊，另訂日子重賽。
Ｄ馬房之擁躉Ａ先生本來人見人怕，個個驚佢口大。但係Ｄ先生搶閘成功尚未到達終點之際，看台上一眾馬迷紛紛趨前，與Ａ先生同聲高呼：「頂住，頂住，阿Ｄ頂住。」更同Ａ先生拍晒膊頭㖭。一位馬迷同Ａ先生講：「你會唔會做廣管局主席呀？」另一馬迷冷笑：「Junior一啲喎，叫Ａ先生睇住電台電視，雖然係熟手，唔夠照啫。」又有人講：「Ａ先生做局長，督促房委會唔畀領匯上市，同時解決房委會財政危機！」聲音多多，Ａ先生不為所動，佢個款點會要做官吖，只係全神睇住條跑道，驚住草皮上最後一百二十米有個窿，Ｄ先生踩落去，就會馬失前蹄，重演幾十年前郭子猷騎嘅一面倒大熱門「貴妃」在終點前墮倒不起，輸死馬迷的故事。
Ａ先生被稱為Ｄ先生之老友，Ｄ先生之老友之老友就係傳媒Ｆ。傳媒Ｆ收聽到中國會、香港會之午飯八卦料，未來之一百二十天係幕後大決鬥嘅日子，台前反而風平浪靜，一切如常。好多反Ｄ派唔順超，希望透過捉字虱、人大釋法、大佬話事等方法將新的特首（唔知會係邊個，目前Ｄ先生佔咗九成贏面）任期縮為二年，當《基本法》第四十六條冇到，不惜為咗政治權宜而犧牲法治。