吳卓羲七年前任職無綫舞蹈藝員時，月薪僅得七千元，四年多前轉戰幕前的他，現已躍升至新紮小生行列，但月薪仍不足三萬元，不過吳卓羲卻堅拒為了上位而擦高層鞋，因為怕被人講閒話。
吳卓羲九八年加入無綫舞蹈組，其後獲古天樂賞識推薦轉做幕前，於○○年尾躋身藝員之列，做了一年二打六後，旋即躍升成為新紮小生，連拍七套劇集包括播映中的《西廂奇緣》、《英雄．刀．少年》、《衝上雲霄》和《大唐雙龍傳》，未播出的則有《學警雄心》、《肝膽崑崙》和《酒店風雲》。
二十五歲的吳卓羲星途暢順，但談到金錢，他形容自己的薪酬相等於一個辦公室初級主任，他日前在將軍澳接受訪問時說：「嗰時我入行得七千蚊，同做文員差唔多，轉做藝員時加過少少，舊年年中續約，騷錢同底薪又加咗少少。」
問吳卓羲有否三萬元月薪？他搖搖頭道：「我嘅人工等於做個初級主任仔，有廣告拍就賺多啲，都係畀晒屋企，剩番嘅夠我基本開支就得。」
入行短短數年已成為新紮小生，吳卓羲承認很幸運，他說：「以前啲人做十年至有機會，我哋就磨練少啲，所以初頭都吃力同擔心㗎。不過我對自己嘅演出，畀分係合格，重要更加努力。」
吳卓羲揚言吳鎮宇、林峯和劉松仁均曾給他演戲意見，他說：「鎮宇教曉我拍時裝劇時點樣講對白，同林峯拍戲就識得點樣培養默契，松哥教我古裝時點樣打、做手同對白。至於古仔，我會學佢嘅執着，好似喺演戲方面，古仔知道自己嘅位置，唔會搶人鏡，做番本份。」
其實無綫除力捧吳卓羲外，林峯、陳鍵鋒、黃宗澤和馬國明等均為新紮小生，提到這幾位對手，吳卓羲說：「大家係朋友，又唔同類型。林峯係古裝人；馬國明係做奸角嘅演員，佢個樣幾奸、幾變態；陳鍵鋒係斯文太子型，黃宗澤就殺晒清裝。」
在《酒店風雲》中，吳卓羲的角色亦正亦邪，他說：「冇所謂，我都唔想每套戲嘅角色性格太重複，張家輝以前做《天地豪情》夠奸啦，𠵱家幾搞笑。我自己都邪邪哋，不過睇公司安排啦，我唔抗拒做奸仔。」
吳卓羲笑言自己是「邪邪哋」，但不是擦鞋仔。談到不少藝員愛圍在高層身邊博機會，吳卓羲說：「我唔想用呢啲嘢嚟輔助，怕俾人話我擦鞋友，加上我性格又唔係咁。」
跟吳卓羲傳過緋聞的女藝人包括楊怡、胡定欣、唐寧和官恩娜，另又傳他有位貌似梁詠琪的圈外女友，吳卓羲對此統統否認，並揚言已四年多沒拍拖，他說：「如果係嘅我一定認！」
早前吳卓羲和官恩娜拍攝新劇《酒店風雲》時，被拍下駕車送對方回家的照片，繼而傳出緋聞，吳卓羲一臉無辜地說：「十五蚊都唔使跳表就送到佢返屋企，嗰日順路，好近㗎咋。我冇佢電話，又冇聯絡，拍完套劇就完，冇見啦，我日日返工，得嗰兩個鐘頭瞓覺，重問佢攞電話食唔食早餐呀？」
至於楊怡，吳卓羲則承認跟她不止好傾，對方更是他最交心的圈中女性朋友，他說：「我哋識咗七年啦，因為大家跟同一個經理人，但同佢都冇火花，係傾到偈啫。我唔怕緋聞，怕乜呀？如果係嘅我會認，緋聞當笑話聽就算，況且香港人好善忘啫。」
吳卓羲先後演出過七套劇集，但他聲稱未曾愛上過對手，他說：「收工就收工㗎啦，唔一定好投入，鍾意個女仔係因為拍戲嗰陣，未必真正要拍拖至得。我知自己做緊啲乜，一嗌cut頭也不回。唔好搞咁多嘢啦，最好匿埋屋企，我有一隻狗三隻貓，有金魚有龜，喺屋企好忙㗎。」
電視台靚女這麼多，難道吳卓羲不動心嗎？他打趣說：「就係見得多，追唔晒呀。講笑啫！等事業有成先啦，我諗拍拖唔會對工作有影響，只係自己唔想分心，因為重後生。」
吳卓羲家有雙親和一姊，父親從事貿易行業，母親曾隨父工作，但自從吳卓羲在無綫的發展略有成就後，母親便安心在家享清福，現時吳母閒來以湊小孫兒為樂，偶爾又會到兒子家，為他煲愛心湯水。
吳卓羲說話不多，對於父母的愛，他不會宣之於口，但一直心神意會，他說：「我成日都同佢哋食飯飲茶，盡量抽時間見吓佢哋。喺我心目中，家庭係第一位，之後再到事業、朋友。我會勤力做嘢，希望畀家人有舒適嘅環境居住，希望三十歲前可以買到樓，同家人一齊住。」
吳卓羲續說：「初時父母知道我做dancer，會擔心我日後會點，到後來轉做藝員比以前好啲，我諗佢哋都開心，但媽咪見到我幾日冇覺瞓，都試過擔心到喊。」吳卓羲說時有點戚戚然，頓了一會才說：「屋企人唔係希望個仔要富貴，係希望我健康，點解個仔有份好工，但要咁辛苦先賺到錢？雖然我唔係搵好多錢，但我同自己講過，要孭起呢頭家，要畀屋企人最好嘅。」
採訪：朱倬誼 攝影：陳慧安
