青衣人狗大暴走空氣清新最開心
黃梅天一下雨就連綿數天，令人氣悶，冷風吹得我騰騰震，惟有自製「陽光」！寫稿時看着當日郊遊時、如陽光燦爛的狗臉，心裏不期然就暖起來。
帶愛犬出走郊外，代表主人的三種誠意：讓愛犬暫時回歸大自然的懷抱；空氣清新，心情特別開朗；心情開朗，有充足活動機會，身體更健康。這次就為大家介紹青衣自然徑。
記者：邵超
攝影：楊錦文
鳴謝：狗友城堡（www.castle-of-dogs.com）
在挑選第一次的聚會的地點時，「狗友城堡」非常明白狗主和寵物的心意，左思右想就選了青衣自然徑，十來隻狗成為遊徑的「焦點人物」，逗得遊人個個笑盈盈，一時笑聲響遍山嶺。
閒人免進
■狗友城堡第一次聚會，個個掛住拍大合照，右邊的小女孩則等住有狗得閒，可以撩撩！
走狗
■橫掂出完街都要大清洗一輪，難得有個大草地任跑唔嬲，咪俾佢哋玩吓集體遊戲。
阻住搵食
■「唔想咁樣，可以點樣！」是飲水受阻的受害者的心聲，可惜人多勢眾，惟有啞忍。
最好玩
如果要找出一個形容詞形容當日的快樂，我會選「幼稚」。大家不要誤會，所指的「幼稚」，是指大家好像回到中學時代嘻嘻哈哈過日子般寫意，無端端也會儍笑、大笑一輪式的「幼稚」。當大家經歷步行過百級石級的熱身運動後，即使最初不相識，人與人之間、狗與狗之間的話匣子早已打開了。一行14人18狗浩浩蕩蕩霸佔二號野餐區，坐在這兒向右望去，青衣大橋的美景即時映入眼簾，在這裏玩集體遊戲，心情又怎能不開朗！
燙手山芋
■個個接到繩索，都要快快脫手，唔係就會出現以下場面——被狗圍。
狗同你玩
■拋波仔遊戲的變奏，狗仔鬥走得快，人就要把口快，人狗都玩到索晒氣。
吃飯有罪
■一人帶一樣食物，由於食物眾多，大家食到捧住個肚，最後三文治淪為遊戲輸家的刑罰。
有寶咩！
■圈圈同童童非常熱衷搶繩索，其他狗就話之你哋搶餐飽。
狗同你玩
■拋波仔遊戲的變奏，狗仔鬥走得快，人就要把口快，人狗都玩到索晒氣。
時時食
手上有食物，就等如拎住張白金卡，隻隻狗搶住巴結奉承你！究竟啲狗狗鍾意食街邊小吃還是住家菜呢？
■當日會員好心義賣香港保護遺棄動物協會的狗餅，四隻狗狗聞到陣陣愛心味，即時快步跑到美食前。
■狗友城堡會員一人帶一款美食，當然唔會漏咗愛犬嘅午餐和點心，不少人好似幹事咁自製有營狗餅，又引嚟五隻狗圍住等食。
最易遊
山賊即使「打橫嚟行」，有狗同行就甭怕了。青衣自然徑是一條輕鬆易行的郊遊點，走畢全程只需一個半小時，設施規劃都做得不俗。此徑的位置十分方便，北面入口附近多個屋苑包括長宏村，曉峰園等皆可泊車，再步行至長宏村寮肚路自然徑入口即可，沿途可以遠眺青馬大橋、汀九大橋、荃灣和深井，綠林處處，有多個草地，最適宜攜愛犬來玩。而且這裏樹木、大橋、海景樣樣齊備，是拍寵物寫真的最佳地點之一。
青馬連一線
■無時間咋，夜少少黃昏啲景重靚！
好玩CheckPoint！
熱身運動
■過百級樓梯，狗狗想唔Fit都難！
放牧
■草地面積足夠十來隻狗扮萬馬奔騰，重有樹林做背景，影相唔錯！
隨便坐
■行到攰攰哋，咪坐吓囉！草長得又長又密，沿石級無償奉獻。
設施夠齊
■設有3個野餐區和4個觀景亭，齊枱齊椅，二號區可以睇到青馬大橋。
狗狗奧斯卡
啊妹：狗「貓行」
■出席頒獎禮，行「紅地氈」時要扮晒顧盼自豪，晒吓星味！
臘腸狗：二捕曲
■兩度被發現亂吠亂叫擾亂秩序的結果，咪就係狗飾變「孖葉」?!
Oscar：發狗瘟
■大型的賽事裏，發台瘟同爆肚的發生或然率都差唔多，笑吓咪遮到醜囉！
Nicky：入型入格
■頭部傾斜約30度，加埋炯炯眼神，警匪片主角通常都係咁嘅樣。
Parco：蠱惑狗
■狗都要食腦，係咁意做個蠱惑表情，行前遮住隔籬就搶到鏡！